غیر مقامی ووٹروں کی انتخابات میں شرکت صحیح نہیں ۔ ڈاکٹر کرن سنگھ

’انتخابات کے بغیر جمہوریت بے معنی ،جموں کشمیر میں جلد سے جلد الیکشن کرائے جائیں
جموں کشمیر کے آخری مہاراجہ کے فرزند ڈاکٹر کرن سنگھ نے مرکزی سرکار پر زور دیا ہے کہ جموں کشمیر میں جلد سے جلد انتخابات کرائے جائیں تاکہ ایک عوامی نمائندہ سرکار وجود میں آئیں جو عوامی مسائل کی طرف توجہ دے سکیں ۔ کرن سنگھ نے کہاکہ دفعہ 370کی منسوخی کے بعد اگر کچھ بدلا ہے تو وہ جھیل ڈل ہے ۔ اس دوران انہوں نے بتایا کہ غیر مقامی ووٹروں کا انتخابات میں حصہ لینا کسی بھی طرح سے صحیح نہیں ہے ۔ اطلاعات کے مطابق جموں کشمیر کے آخری مہاراجہ ہری سنگھ کے پوتے اور کانگریس کے سینئر رہنما ڈاکٹر کرن سنگھ نے سوموارکے روز کہا کہ ’انتخابات کے بغیر جمہوریت بے معنی ہے‘۔ انہوں نے کہا کہ جموں و کشمیر میں انتخابات ہونے چاہئیں اور یہ تمام سیاسی جماعتوں کا مطالبہ ہے۔ ڈاکٹر کرن سنگھ نے کہا، ”میں نے سنا ہے کہ مارچ میں انتخابات ہوں گے لیکن مجھے یقین نہیں ہے کیونکہ میں نے صرف یہ سنا ہے اور یہ کوئی سرکاری بیان نہیں ہے“۔سرینگر میں صحافیوں سے بات کرتے ہوئے سنگھ نے کہا کہ جموں و کشمیر میں غیر مقامی ووٹروں کو شامل کرنے کے بارے میں ان کے خیالات غیر واضح ہیں۔ یہ عجیب معاملہ ہے۔ کچھ کہتے ہیں کہ غیر مقامی ووٹرز کا اندراج لاکھوں میں ہو رہا ہے اور کچھ کہتے ہیں کہ ہزاروں میںتاہم یہ صحیح نہیں ہے کسی بھی غیر مقامی شہری کو یہاں پر ووٹ ڈالنے کا حق دینا سراسر ناانصافی ہوگی کیوں کہ حکومت یہاں کے عوام کےلئے منتخب ہونی ہے توباہری لوگ کس حق سے ہمارے لئے حکمران چنیں گے ۔راہل گاندھی کی ’بھارت جوڑو یاترا‘ پر اطمینان کا اظہار کرتے ہوئے سنگھ نے کہا کہ یہ دیکھنا بھی اچھا ہے کہ کانگریس پارٹی میں انتخابات ہوتے ہیں اور یہ طویل عرصے کے بعد ہو رہے ہیں۔ ایک سوال کے جواب میں انہوں نے کہا کہ دفعہ 370 منسوخی کے بعد بہت سارے دعوے کیے جا رہے ہیں لیکن زمینی حقیقت کچھ اور ہے۔ ہاں، ایک چیز جس کا میں گواہ ہوں وہ یہ ہے کہ ڈل جھیل صاف ستھری ہو گئی ہے۔ اس جھیل کو صاف دیکھ کر خوشی ہوئی، لیکن میں خوش ہوں اور خود دیکھا ہے، اس جھیل کو دوبارہ زندہ کیا جا رہا ہے اور یہ چیز 2019 کے بعد ہوئی ہے۔ باقی انہوں نے کہا ہے کہ جموں و کشمیر میں نافذ ہونے والے دیگر فیصلوں میں وقت لگ سکتا ہے۔ڈاکٹر کرن سنگھ نے شوپیان میں ایک کشمیری پنڈت کی ہلاکت کے بارے میں بتایا کہ یہ سراسر قابل مذمت ہے اور آج تک جتنے بھی بے گناہ لوگ مارے گئے ہیں ہمیں کافی دکھ ہے ۔ انہوں نے پنڈت پورن کے اہلخانہ کے ساتھ یکجہتی اور ہمدردی کااظہار کیا ہے ۔ اس دوران انہوں نے کہا کہ سرکار کو چاہئے کہ ہر شہری کی حفاظت کو یقینی بنائیںچاہے وہ مقامی ہو یا غیر مقامی ہر ایک یہاں پر امن و سکون کے ساتھ رہنا چاہتا ہے ۔