برفانی علاقوں میں گشت کرنےوالے فوجیوں کیلئے خوشخبری

راڈار برفانی تودے گرنے سے پہلے وارننگ دے گا، فوجی زد میں آنے سے بچ جائیں گے
نئی دہلی، 23 ستمبر (یو این آئی) زیادہ اونچائی والے ناقابل رسائی برفانی علاقوں میں گشت کرنے والے فوجیوں کو اب چند سیکنڈ پہلے ہی راڈار برفانی تودے کی وارننگ مل جائے گی اور وہ اس کی زد میں آنے سے بچ جائیں گے ۔ ان ریڈاروں کی مدد سے لینڈ سلائیڈنگ کا بروقت پتہ لگانے میں بھی مدد ملے گی۔ یہ ریڈار آرمی اور ڈیفنس جیو انفارمیٹکس اینڈ ریسرچ اسٹیبلشمنٹ نے مشترکہ طور پر نصب کیا ہے ۔ تری شکتی کور کے جنرل آفیسر کمانڈنگ لیفٹیننٹ جنرل ترن کمار منگل کو شمالی سکم میں 15,000 فٹ کی بلندی پر واقع ایک فارورڈ پوسٹ پر نصب کیا۔ یہ راڈار، جو ملک میں اپنی نوعیت کا پہلا ہے ، تین سیکنڈ میں برفانی تودے کی وارننگ دینے کی صلاحیت رکھتا ہے اور اونچائی والے علاقوں میں فوجیوں اور املاک کو پہنچنے والے نقصان کو روکنے میں مدد کرے گا۔ یہ ریڈار ہر قسم کے موسم میں دن رات کام کر سکتا ہے ۔ یہ ریڈار برف اور دھند کے نیچے کی نقل و حرکت کا بھی پتہ لگا سکتا ہے ۔ یہ الارم سسٹم سے بھی منسلک ہے اور اس کے ذریعے واقعے کی تصاویر اور ویڈیوز بھی ریکارڈ کی جا سکتی ہیں جس سے ان کا تجزیہ کرنا آسان ہو جائے گا۔ ایسے ریڈار ان علاقوں میں بہت کارآمد ثابت ہوں گے جہاں اچانک برفانی تودہ گرتا ہے ۔