امتحانات کے پرچے20لاکھ میں فروخت کرنے کا معاملہ

سی بی آئی نے سری نگر اور جموں سمیت 33مقامات پر چھاپے مارے ، ایس ایس بی کے سابق ملازمین کی گرفتاریاں متوقع
سروسز سلیکشن بورڈ میں ہوئی دھاندلیوں میں ملوث افراد کو پکڑنے کی خاطر سی بی آئی نے منگل کے روز جموں اور سری نگر سمیت 33مقامات پر چھاپہ ماری کی جس دوران اہم کاغذات ضبط کئے گئے۔ سی بی آئی ذرائع نے بتایا کہ سروسز سلیکشن بورڈ کے کنٹرولر امتحانات کے گھر کو بھی کھنگالا گیا۔اطلاعات کے مطابق جموں وکشمیر کے تعلیم یافتہ نوجوانوں کے مستقل کے ساتھ کھلواڑ کرنے اور بھرتیوں کے دوران قبل از وقت امتحانی پرچے افشاں کرنے کے بعد سی بی آئی نے منگل کے روز سری نگر اور جموں سمیت 33مقامات پر چھاپے ڈالے۔ ذرائع نے بتایا کہ ایس آئی اور فائنانشل اکاونٹ اسسٹنٹ امتحانات میں بڑے پیمانے پر دھاندلیوں میں ملوث افراد کے خلاف سی بی آئی نے کریک ڈاون شروع کیا۔ ذرائع نے بتایا کہ جس ایجنسی نے امتحان لیا اُس کے آفس کو بھی بنگلورو میں کھنگالا گیا اور وہاں سے اہم کاغذات ضبط کئے گئے ہیں۔ ذرائع کے مطابق سی بی آئی نے جموں میں ایس ایس بی کے کنٹرولر امتحانات کے گھر کو بھی کھنگالا اور وہاں سے بھی کاغذات ضبط کئے گئے۔ ذرائع کا کہنا ہے کہ پہلے مرحلے پر بڑے مگر مچھوں کے گھروں کو کھنگالا گیا اور آنے والے دنوں کے دوران سروسز سلیکشن بورڈ میں تعینات ملازمین کو بھی تحقیقات کے دائرے میں لانے کا امکان ہے کیونکہ مذکورہ ملازمین پچھلے تیس برسوں سے سروسز سلیکشن بورڈ میں تعینات تھے اور اُن سے پوچھ تاچھ ہو سکتی ہے۔ ذرائع نے بتایا کہ جموں وکشمیر انتظامیہ نے سی بی آئی کو تحقیقات کرنے کی مکمل آزادی ہے اور بہت جلد اس حوالے سے گرفتاریاں بھی متوقع ہے۔ باوثوق ذرائع کے مطابق سروسز سلیکشن بورڈ کے سابق چیرمینوں کی بھی گرفتاریاں متوقع ہے اور اس حوالے سے بڑے پیمانے پر صلاح مشورہ جاری ہے۔