نائک مکیش سنگھ منہاس کے سوگوار کُنبے سے جاملے؛ دہشت گردانہ کارروائیوں کی مذمت
سرینگر: اپنی پارٹی کے صوبائی صدر سردار منجیت سنگھ نے آج فوج کے نائیک مکیش سنگھ منہاس، جو کیپٹن کرم جیت سنگھ بخشی کے ساتھ گزشتہ روز لائن آف کنٹرول پر اکھنور سیکٹر میں بارودی سرنگ کے ایک دھماکے میں جاں بحق ہوئے، کے لواحقین سے ملاقات کی اور اُن کے ساتھ اپنی دلی ہمدردی اور تعزیت کا اظہار کیا۔ منجیت سنگھ کے ہمراہ پارٹی کے ضلع یوتھ صدر سانبہ منگت رام بھی تھے۔
موصولہ بیان کے مطابق منجیت سنگھ نے سانبہ ضلع کے بری کمیلا گاؤں میں منہاس کے سوگوار خاندان سے ملاقات کی۔ انہوں نے اہل خانہ سے ملاقات کے دوران ان کے ساتھ اپنی تعزیت اور یکجہتی کا اظہار کیا۔ اس موقع پر انہوں نے بھارت میں دہشت گردی پھیلانے پر پاکستان کی شدید مذمت کی۔
انہوں نے کہا، ’’مجھے آئی ای ڈی دھماکے میں دو فوجی افسران کے نقصان سے بہت بے حد دُکھ اور افسوس ہوا ہے۔ یہ بارودی سرنگ کنٹرول لائن کے اکھنور سیکٹر میں سرحد پار سے آئے دہشت گردوں نے نصب کی تھی۔ اپنی پارٹی دُکھ کی اس گھڑی میں ان شہداء کے خاندانوں کے ساتھ یکجہتی کے لیے کھڑی ہے۔ میں جموں و کشمیر میں دہشت گردی کو ہوا دینے میں پاکستان کے کردار کی شدید مذمت کرتا ہوں۔‘‘
