کپوارہ میں سڑک حادثہ ،ایک فوجی اہلکار ہلاک اور ایک زخمی

کپوارہ میں سڑک کے ایک حادثے میں ایک فوجی اہلکار ہلاک اور ایک زخمی ہوا ہے ۔ ادھر جنوبی کشمیر کے ضلع پلوامہ کے نیوا علاقے میں منگل کی صبح ایک تیز رفتار ٹپر نے کم و بیش ڈیڑھ درجن بھیڑ بکریوں کو کچل کر ہلاک کر دیا۔اطلاعات کے مطابق سرحدی ضلع کپوارہ میں سڑک کے ایک حادثے میں ایک فوجی اہلکار ہلاک ہوا ہے اور ایک زخمی ۔ معلوم ہوا ہے کہ منگل کے روز ایک فوجی گاڑی ڈرائیور کے قابو سے باہر ہوئی جس کے نتیجے میں اسے حادثہ پیش آیا ۔ گاڑی میں سوار دھرمیندر سنگھ ولد پرویش سنگھ فوت ہوا ہے جبکہ سکھ پال سنگھ ایک اور فوجی اہلکار زخمی ہوا ہے ۔ ذرائع نے بتایا کہ حادثے کے فورا بعد اگرچہ زخمیوں کو فوری طور پر ہسپتال پہنچایا گیا تاہم ان میں سے ایک کو ڈاکٹروں نے مردہ قراردیا۔ مہلوک فوجی اہلکار 4ویں سکھ یونٹ سے وابستہ تھا ۔ دریں اثناء جنوبی کشمیر کے ضلع پلوامہ کے نیوا علاقے میں منگل کی صبح ایک تیز رفتار ٹپر نے کم و بیش ڈیڑھ درجن بھیڑ بکریوں کو کچل کر ہلاک کر دیا۔پولیس ذرائع نے بتایا کہ پونچھ کے ایک بکروال فیملی اپنے بھیڑ بکریوں کے ایک جھنڈ کے ساتھ جنوبی کشمیر کے ضلع پلوامہ کے بالائی علاقوں سے واپس اپنے گھر کی طرف جا رہی تھی۔انہوں نے کہا کہ نیوا کے نزدیک ایک تیز رفتار ٹپر نے ان کے کم سے کم 16 بھیڑ بکریوں کو کچل کر ہلاک کر دیا۔