افغانستان میں برطانوی فوج کے ہاتھوں 54 شہریوں کے قتل کا انکشاف

غیر مسلح افغان مردوں کو ہلاک کرکے لاشوں پر ہتھیار رکھے جاتے تھے تاکہ جرائم کا جواز پیش کیا جاسکے
لندن: ۳۱ جولائی (ایجنسیز) برطانوی نشریاتی ادارے (بی بی سی) کی تحقیقات میں انکشاف ہوا ہے کہ برطانیہ کی ایلیٹ اسپیشل ایئر سروس (ایس اے ایس) کور کے کمانڈوز نے افغانستان میں دوران قیام 54 افغان شہریوں کو مشکوک حالات میں قتل کیا، لیکن اعلیٰ فوجی حکام نے اس سے آگاہ ہونے کے باوجود اسے چھپایا۔ 4 سال تک جاری رہنے والی تحقیقات میں انکشاف کیا گیا کہ طویل جنگ کے دوران رات گئے چھاپوں میں ایس اے ایس کے فوجیوں کی جانب سے غیر مسلح افغان مردوں کو آئے روز گولی مار کر ہلاک کیا جاتا تھا اور ان کی لاشوں پر ہتھیار رکھ دیے جاتے تھے تاکہ جرائم کا جواز پیش کیا جاسکے۔ رپورٹ میں کہا گیا کہ اس وقت یو کے اسپیشل فورسز کے سربراہ جنرل مارک کارلٹن اسمتھ سمیت سینئر افسران ایس اے ایس کے اندر کارروائیوں کے بارے میں خدشات سے آگاہ تھے، لیکن ملٹری پولیس کو آگاہ کرنے میں ناکام رہے۔ بی بی سی نے کہا کہ برطانیہ کے قانون کے مطابق کسی کمانڈنگ افسر کے لیے فوجی پولیس کو ممکنہ جنگی جرائم کے بارے میں مطلع نہ کرنا ایک قابل سزا جرم ہے۔ گزشتہ ماہ برطانوی فوج کے سربراہ کی حیثیت سے ریٹائر ہونے والے کارلٹن اسمتھ نے ‘بی بی سی’ کے پروگرام ‘پینوراما’ پر تبصرہ کرنے سے انکار کردیا جس میں کہا گیا تھا کہ اس کی تحقیقات عدالتی دستاویزات، لیک ہونے والی ای میلز اور افغانستان میں اس کے اپنے صحافیوں کے آپریشن کی جگہوں کے سفر پر مبنی ہیں۔ وزارت دفاع نے کہا کہ افغانستان میں برطانوی افواج کے طرز عمل سے متعلق پیشگی تحقیقات میں الزامات عائد کرنے کے لیے شواہد ناکافی ہیں۔ وزارت دفاع نے بی بی سی کو ایک بیان میں کہا کہ ’کوئی نیا ثبوت پیش نہیں کیا گیا ہے لیکن سروس پولیس نئے شواہد سامنے آنے پر کسی بھی الزامات پر غور کرے گی‘۔ انہوں نے کہا کہ برطانیہ کی مسلح افواج نے افغانستان میں جرا?ت اور پیشہ وارانہ مہارت کے ساتھ خدمات انجام دیں اور ہم انہیں ہمیشہ اعلیٰ ترین معیار پر فائز رکھیں گے۔ کارروائی کے بعد کی رپورٹس سے ظاہر ہوتا ہے کہ دیگر افسران یونٹ کی جانب سے ہونے والی ہلاکتوں کی بلند شرح پر حیران ہیں کیونکہ ایس اے ایس فوجیوں میں سے کسی نے بھی طالبان کے ساتھ فائرنگ کے دوران زخمی ہونے کی اطلاع نہیں دی۔