نائیجریا میں دو بسوں کے ٹکرانے سے 37 افراد ہلاک

ابوجا، 23 نومبر (یو این آئی) شمال مشرقی نائجیریا کے بورنو شہر میں دو بسوں کے ٹکرانے کے حادثے میں کم از کم 37 افراد جاں بحق ہو گئے ۔ بورنو کے ٹریفک پولیس افسر نے یہ اطلاع دی۔بورنو میں فیڈرل روڈ سیفٹی کور کے سیکٹر کمانڈر یوٹانبوئی نے منگل کی دیر رات یہاں نامہ نگاروں کو بتایا کہ دو بسوں میں مائدوگوڑی-داماتورو روڈ پر آمنے سامنے ٹکرانے کے بعد آگ لگ گئی۔پولس افسر نے حادثے کے لیے بس ڈرائیوروں کو ذمہ دار ٹھہرایا ہے جو تیز رفتاری سے ڈرائیونگ کررہے تھے ۔ انہوں نے بتایا کہ دونوں بسیں مخالف سمتوں میں جا رہی تھیں لیکن ان میں سے ایک نے اپنا کنٹرول کھو دیا۔ جس کی وجہ سے دونوں بسیں آپس میں ٹکرا گئیں۔افسر نے کہا کہ حادثے میں تمام مہلوکین کی اجتماعی تدفین آج کی جائے گی کیونکہ پولیس کو پہلے ہی اس سلسلے میں عدالتی حکم مل چکا ہے ۔واضح رہے کہ نائجیریا میں اس طرح کے خوفناک سڑک حادثات اکثر ہوتے رہتے ہیں۔ جس کی بنیادی وجہ گاڑیوں کی تیز رفتاری، اوور لوڈنگ، خراب سڑکیں اور ڈرائیور کی لاپرواہی کو سمجھا جاتا ہے ۔