پوجا کی اجازت دینے کی درخواست پر علیحدہ سے غور کرنے سے انکار

گیان واپی کمپلیکس ’شیولنگ‘ تنازعہ پر سپریم کورٹ ضلعی عدالت کے فیصلے کا انتظار کرے گی
نئی دہلی، ۱۲ جولائی(یو این آئی) سپریم کورٹ نے وارانسی میں گیان واپی مسجد کمپلیکس کے اندر کورٹ کمشنر کے سروے کے دوران مبینہ طور پر پائے جانے والے ”شیولنگ“کی پوجا کرنے کی اجازت دینے کی درخواست پر علیحدہ سے غور کرنے سے جمعرات کو انکار کر دیا۔ عدالت عظمیٰ نے متنازعہ گیان واپی مسجد سے متعلق ایک اور معاملے میں انجمن انتظامیہ مسجد کمیٹی وارانسی کی جانب سے سماعت کی اپیل پر کہا کہ وہ ضلعی عدالت کے فیصلے کا انتظار کرے گی۔ جسٹس ڈی وائی چندرچوڑ کی سربراہی والی بنچ نے عبادت کی اجازت کی عرضی پر الگ سے غور کرنے سے انکار کرتے ہوئے الہ آباد ہائی کورٹ کے حکم کے خلاف انجمن انتظامیہ مسجد کمیٹی وارانسی کی عرضی پر سماعت اکتوبر تک ملتوی کر دی۔کمیٹی نے گیان واپی مسجد کے احاطے میں سروے کرنے کے لیے کمشنر کی تقرری کے مقامی عدالت کے فیصلے کو برقرار رکھنے کے ہائی کورٹ کے حکم کو چیلنج کیا تھا۔وارانسی کی ضلع عدالت اس بات پر غور کر رہی ہے کہ آیا کمیٹی کے اعتراض کا معاملہ قابل سماعت ہے ۔