کنہیا لال قتل کیس کے تین ملزمان کو بھی جیل بھیجا گیا

جے پور، ۶۱جولائی (یو این آئی) راجستھان کے ادے پور کنہیا لال قتل کیس کے دو اہم ملزمین سمیت تین ملزمان کو بھی آج عدالت نے جیل بھیج دیا۔ اس معاملے کی تحقیقات کرنے والی قومی تحقیقاتی ایجنسی (این آئی اے ) نے کنہیا لال قتل کیس کے اہم ملزم ریاض عطاری اور محمد غوث اور دیگر ملزم فرہاد کوریمانڈ کی مدت ختم ہونے پر ہفتہ کو این آئی اے خصوصی عدالت میں پیش کیاگیا، جہاں تینوں ملزمین کو عدالتی تحویل میں بھیج دیا گیا۔ واضح رہے کہ اس کیس میں گرفتار 7 ملزمان کو 12 جولائی کو عدالت میں پیش کیا گیا جہاں ان کی ریمانڈ میں 16 جولائی تک توسیع کردی گئی تھی جب کہ ملزمان آصف، محسن، وسیم علی اور محمد محسن کو جیل بھیج دیا گیا تھا۔ 28 جون کوادے پور میں کنہیالال ساہو کو ان کی دکان میں حملہ کر کے قتل کر دیا گیا تھا۔