یوم آزادی سے قبل سرینگر عید گاہ میں گرنیڈ حملہ

سی آر پی ایف کا ایک سب انسپکٹر زخمی ، حملہ آوروں کی تلاش جاری
سرینگر/
یوم آزادی 15اگست سے دو روز قبل ہی سرینگر میں جنگجوﺅں نے اپنی موجودگی کااظہار کرتے ہوئے ایک سی آر پی ایف بینکر کو نشانہ بناکر گرنیڈ پھینکا جس کے نتیجے میں ایک سب انسپکٹر زخمی ہوا ہے ۔ ذرائع کے مطابق عید گاہ سرینگر میں سی آر پی ایف بینکر پر نامعلوم افراد نے ہفتہ کی شام گرنیڈ پھینکا جو زور دار دھماکے کے ساتھ پھٹ گیا جس کے آہنی ریزوں کی زد میں آکر ایک اہلکار زخمی ہوا ہے ۔ اطلاعات کے مطابق عید گاہ سرینگرمیں سی آر پی ایف کا ایک سب انسپکٹر اُس وقت زخمی ہوا جب وہاں پر موجود ایک بینکر کو نشانہ بنانے کی غرض سے نامعلوم افراد نے گرنیڈ سے حملہ کیا ۔ گرنیڈ زور دار دھماکہ کے ساتھ پھٹ گیا جس کے نتیجے میں سب انسپکٹر 161بٹالین پرویز رانا زخمی ہوا جس کو فوری طور پر ایس ایم ایچ ایس ہسپتال پہنچایا گیا ۔ اس واقعے کی تصدیق کرتے ہوئے پولیس ذرائع نے بتایا کہ حملہ کے فورا ً بعد پولیس اور فورسز نے علاقے کو محاصرے میں لیکر حملہ آوروں کی تلاش شروع کردی ۔ ادھیر ذرائع نے بتایا کہ گرنیڈ دھماکہ کے نتیجے میں علاقے میں خوف و دہشت کا ماحول پھیل گیا اور لوگ سہم کے رہ گئے ۔ ادھر آخری اطلاع ملنے تک پولیس اور فورسز علاقے میں گرنیڈ پھینکنے والوں کی تلاش جاری رکھے ہوئے تھے ۔