اگلے چند سالوں میں ہم 70ہزار کروڑ روپیہ کی سرمایہ کاری کا ہدف حاصل کریں گے / لیفٹنٹ گورنر منوج سنہا

8لاکھ نوجوانوں کو آئندہ کچھ سالوں میں روزگار حاصل ہو گا ، پنچایتی راج کو مضبوط کرنے کی خاطر زمینی سطح پر کام کیا گیا
وزیر اعظم نریندر مودی کی متحرک و فعال قیادت میں جموںکشمیر کا 70سالہ پرانا خواب ” ایک ودھان ، ایک پردھان اور ایک نشان“ آج پورا ہو گیا کی بات کرتے ہوئے جموںکشمیر کے لیفٹنٹ گورنر منوج سنہا نے کہا کہ جموں وکشمیر میں پنچایتی راج کو مضبوط کرنے کی خاطر زمینی سطح پر کام کیا گیا اور تین ٹائر پنچایتی راج سسٹم قائم ہے جس سے پنچایتی نمائندوں کو اختیارات حاصل ہوئے ہیں۔انہو ں نے مزید کہا کہ 8لاکھ جموںکشمیر کے نوجوانوں کو آئندہ کچھ سالوں میں روزگار حاصل ہو گا ۔ اطلاعات کے مطابق جموںکے سانبہ کے پلی گاﺅں میں پنچایتی راجدیوس کے موقع پر منعقدہ ایک ریلی سے خطاب کرتے ہوئے جموںکشمیر کے لیفٹنٹ گورنر منوج سنہا نے وزیر اعظم نریندر مودی کا استقبال کرتے ہوئے کہا کہ ایسا پہلی مرتبہ ہوا ہے کہ ملک میںکشمیر سے کیناکماری تک ایک ہی پرچم اور ایک ہی لیڈر ہے جو آج ہمارے سامنے کھڑا ہے ۔ لیفٹنٹ گورنر منوج سنہا نے کہا ”سال 1947 کے بعد جموں وکشمیر میں صرف 15ہزار کروڑ کی سرمایہ کاری ہوئی جبکہ آج جموں وکشمیر حکومت کے پاس 52 ہزار کروڑ روپیہ کی تجاویز ہیں جن میں سے 38 ہزار کروڑ روپیہ کی سرمایہ کاری کی تجاویزکا وزیر اعظم نریندر مودی نے آج افتتاح کیا“۔منوج سنہا نے مزید کہا کہ اگلے چند سالوں میں ہم 70ہزار کروڑ روپیہ کی سرمایہ کاری کا ہدف حاصل کریں گے جس کے ذریعے تقریباً سات سے آٹھ لاکھ نوجوانوں کو روزگار ملے گا۔ انہوں نے مزید بتایا کہ موجودہ مرکزی حکومت جموں وکشمیر میں تعمیرو ترقی کے خواب کو شرمندہ تعبیر کرنے کی خاطر زمینی سطح پر کام کر رہی ہیں۔لیفٹنٹ گورنر نے کہا کہ جموں وکشمیر میں پنچایتی راج کو مضبوط کرنے کی خاطر زمینی سطح پر کام کیا گیا اور آج یہاں پر تین ٹائر پنچایتی راج سسٹم قائم ہے جس سے پنچایتی نمائندوں کو اختیارات حاصل ہوئے ہیں۔منوج سنہا نے مزید کہا کہ وزیر اعظم نریندر مودی کی فعال قیادت میں یونین ٹریٹری کا ایک ودھان، ایک نشان اور ایک پردھان کا ستر سالہ پرانا خواب شرمندہ تعبیر ہوا ہے۔ انہوں نے بتایا کہ دفعہ 370 کے خاتمہ کے بعد جموں وکشمیر بھارت میں حقیقی معنوں میں ضم ہوا ، اور یہ کہ آج جموں وکشمیر میں تعمیر وترقی کا دوردورہ ہے اور لوگ بھی آزاد فضاﺅں میں سانس لے رہے ہیں۔اس موقع پر وزیر اعظم دفتر میں تعینات وزیر مملکت ڈاکٹر جتیندر سنگھ نے کہاکہ پی ایم مودی کی قیادت میں جموں وکشمیر کے لوگوں نے حقیقی خود حکمرانی کو پھلتے پھولتے ہوئے دیکھا۔انہوں نے بتایا کہ جموں وکشمیر میں حالات اب پوری طرح سے معمول پر آچکے ہیں اور اب باہر کے لوگ یہاں پر بڑے پیمانے پر سرمایہ کاری کرنے کے خواہاں ہے جس سے یہاں کے نوجوانوں کو روزگار ملے گا۔