معاملے کو سنبھالنے کیلئے دوسرے طریقے تلاش کرنے ہونگے: امریکہ
پیرس:۸ مارچ(یواین آئی) امریکی نائب وزیر خارجہ وینڈی شرمین نے کہا کہ مغربی ممالک اب تک یوکرین کو ہتھیار فراہم کرنے میں کامیاب رہے ہیں لیکن آنےوالے دنوں میں یہ مزید مشکل ہو سکتا ہے۔ رپورٹس کے مطابق امریکی نائب وزیر خارجہ نے کہا کہ میرے خیال میں انتہائی مشکل حالات میں بھی یوکرین کو ہتھیاروں کی سپلائی غیر معمولی رہی ہے۔
انہوں نے وضاحت کے بغیر کہا کہ بین الاقوامی برادری نے بہت زیادہ ردعمل ظاہر کیا ہے اور اس نے ہتھیارحاصل کرنے کے طریقے تلاش کرلئے ہیں جبکہ یہ آنےوالے دنوں میں مزید مشکل ہو سکتا ہے اسلئے ہمیں اس معاملے کو سنبھالنے کیلئے دوسرے طریقے تلاش کرنے ہوں گے۔ واضح رہے کہ 24 فروری کو روس کے حملے کے بعد سے مغربی اتحادیوں کی جانب سے یوکرین میں ہتھیار، گولہ بارود اور رقوم کی بھرمار ہوئی۔ امریکہ نے گزشتہ مہینے 350 ملین ڈالرزکے فوجی سازوسامان کی منظوری دی تھی تاکہ یوکرین کی حکومت کو حملہ سے لڑنے میں مدد ملے، واضح رہے کہ یہ امریکی تاریخ کا سب سے بڑا پیکج تھا۔ دریں اثنا، یوروپی یونین نے بھی یوکرین کو کل 500 ملین ڈالرز ہتھیاروں کی خریداری اور ترسیل کے لیے مالی مدد فراہم کرنے پر اتفاق کیا۔ ذرائع نے بتایا کہ آنے والے دنوں میں یوکرین کے حامی ممالک انہیں ہتھیار کیسے سپلائی کریں گے ، یہ سب سے اہم ہوگا۔
