امریکہ کا روس پر پابندیاں عائد کرنے کا اعلان

امریکی شہریوں کو سرمایہ کاری سے روکنے کے حکم نامے پر بائیڈن کے دستخط
واشنگٹن/ ایجنسیز/ امریکہ نے روس کی جانب سے مشرقی یوکرین کے علاقوں ڈونیسک اور لوہانسک کو آزاد علاقے تسلیم کرنے کے اعلان پر ماسکو پر پابندیاں لگانے کا اعلان کیا ہے۔ صدر بائیڈن نے مذکورہ علاقوں میں امریکی شہریوں کو سرمایہ کاری سے روکنے کے حکم نامے پر بھی دستخط کر دیے ہیں۔ وائٹ ہاو¿س کی پریس سیکریٹری جین ساکی نے ایک بیان میں کہا تھا کہ وہ روس کی جانب سے اس اقدام کی توقع کر رہے تھے اور اس پر فوری طور پر ردعمل دیا جائے گا۔ پوٹن کی جانب سے اس اعلان کے بعد مغربی ممالک کا خدشہ مزید گہرا ہو گیا ہے کہ پوٹن نے یوکرین پر حملے کا مصمم ارادہ بنا لیا ہے۔ امریکی انتظامیہ کے سینئیر عہدے دار کا کہنا ہے کہ روس کی جانب سے حملے کا بہت حد تک خطرہ ہے۔ روس کے اس اقدام کی مغرب نے فوری مذمت کی، برطانوی وزیر اعظم بورس جانسن نے اسے ’یوکرین کی خودمختاری اور سالمیت کی کھلی خلاف ورزی‘ قرار دیا۔ یورپی یونین کے سربراہ ارسلا وان ڈیر لیین اور چارلس مشیل نے عہد کیا کہ بلاک ’اس غیر قانونی عمل میں ملوث افراد کے خلاف پابندیوں کے ساتھ رد عمل ظاہر کرے گا‘۔ نیٹو کے سربراہ جینز اسٹولٹن برگ نے بھی پیوٹن کے اس اقدام کی مذمت کرتے ہوئے کہا کہ یہ ماسکو کی جانب سے بین الاقوامی معاہدوں کی خلاف ورزی ہے۔