عید میلادالنبی کی تقریبات کو احسن طور پر منعقد کرانے کےلئے اقدامات

ڈویژنل کمشنر کشمیر کا انتظامات کا جائزہ، عقیدت مندوں کے لیے سہولیات پر زور
سرینگر/عید میلادالنبی کے موقع پر وادی کشمیر میں تقریبات اور عقیدت مندوں کی بڑی تعداد کی شرکت کے پیشِ نظر ڈویژنل کمشنر کشمیر انشل گرگ نے ہفتے کو ایک اعلیٰ سطحی اجلاس طلب کیا، جس میں بڑی زیارت گاہوں اور مساجد پر مکمل انتظامات کو یقینی بنانے پر زور دیا گیا۔اجلاس میں ڈپٹی کمشنرز کشمیر ڈویژن، کمشنر ایس ایم سی، پولیس و ٹریفک حکام کے ساتھ ساتھ کے پی ڈی سی ایل، پی ایچ ای، ایف سی ایس اینڈ سی اے، محکمہ صحت، فائر اینڈ ایمرجنسی، وقف بورڈ اور دیگر متعلقہ محکموں کے افسران کے علاوہ مختلف مزارات کے علما و ائمہ بھی موجود تھے۔ڈویژنل کمشنر نے حضرتبل درگاہ، جناب صاحب صورہ، آثارِ شریف شہری کلاشپورہ، اہم شریف بانڈی پورہ، کبامارگ اننت ناگ، پتھمکھامہ بڈگام، بارہمولہ کے درگاہِ عالیہ سمیت دیگر مقامات پر سہولیات کا جائزہ لیا، جہاں عقیدت مند بڑی تعداد میں جمع ہو کر نعت خوانی اور رات بھر کی عبادات میں شریک ہوتے ہیں۔خصوصی طور پر حضرتبل درگاہ کے انتظامات پر زور دیا گیا جہاں ایک لاکھ سے زائد عقیدت مندوں کی آمد متوقع ہے۔ اس موقع پر کے پی ڈی سی ایل کو بلا تعطل بجلی کی فراہمی اور بیک اپ جنریٹر کی دستیابی یقینی بنانے کی ہدایت دی گئی، جبکہ پی ایچ ای کو پینے کے پانی کے پوائنٹس اور ٹینکروں کا انتظام کرنے کی ہدایت ملی۔زائرین کی آمد و رفت کو سہل بنانے کے لیے ایس ایس سی ایل، آر ٹی سی اور اے آر ٹی او کو خصوصی بسیں اور ای آٹوز چلانے کی ہدایت دی گئی، جبکہ ٹریفک پولیس کو مختلف اضلاع سے آنے والے عقیدت مندوں کے لیے الگ روٹ پلان ترتیب دینے کا حکم دیا گیا۔ اسی طرح ایس ایس پی رورل کو راستوں پر عملے کی تعیناتی یقینی بنانے کے لیے کہا گیا۔وقف حکام کو چار ستمبر سے قبل ہی خیموں کی تنصیب مکمل کرنے، ایس ایم سی کو صفائی ستھرائی مہم چلانے، اور محکمہ صحت کو میڈیکل کیمپ اور عملے کی تعیناتی کا حکم دیا گیا۔ فائر اینڈ ایمرجنسی کو بھی اہم مقامات پر گاڑیاں تعینات رکھنے کی ہدایت کی گئی تاکہ کسی ہنگامی صورتحال سے بروقت نمٹا جا سکے۔ڈویژنل کمشنر نے مارکیٹ چیکنگ ٹیمیں تشکیل دینے، غذائی معیار کی نگرانی اور ناجائز منافع خوری کرنے والے تاجروں کے خلاف سخت کارروائی کی بھی ہدایت دی۔اجلاس میں موجود ائمہ و علما نے انتظامیہ کی تیاریوں پر اطمینان کا اظہار کیا، جبکہ ڈپٹی کمشنرز نے اپنے اپنے اضلاع میں کیے گئے انتظامات کی تفصیلات پیش کیں۔