صدر مرمو افریقہ کے تین ممالک کے دورے کے بعد وطن لوٹ آئیں

نئی دلی/ صدر دروپدی مرمو الجزائر، موریطانیہ اور ملاوی کے اپنے تین ملکوں کے دورے کے اختتام پر آج صبح یہاں واپس  آگئیں۔ہفتہ بھر کا دورہ ہندوستان اور ان افریقی ممالک کے درمیان سفارتی تعلقات کو مضبوط بنانے اور تعاون کو وسعت دینے پر مرکوز تھا۔دورے کا آخری پڑاؤ ملاوی تھا، جہاں صدر مرمو ایک رسمی الوداع کے بعد لیلونگوے کے کاموزو بین الاقوامی ہوائی اڈے سے روانہ ہوئیں۔ملاوی میں، انہوں نے جمعہ کے روز صدر لازارس چکویرا کے ساتھ بات چیت کی، جس کا اختتام کئی مفاہمت کی یادداشتوں (ایم او یوز) پر دستخطوں پر ہوا جس میں فنون و ثقافت، نوجوانوں کے امور، کھیلوں اور فارماسیوٹیکل تعاون جیسے شعبوں کا احاطہ کیا گیا ہے۔یہ دورہ ہندوستان کی صدارت کے دوران افریقی یونین کو G20 کا مستقل رکن بنائے جانے کے ایک سال سے زیادہ عرصے کے بعد ہوا ہے۔وزارت خارجہ نے کہا کہ اس دورے نے افریقہ کے ممالک کے ساتھ اپنے موجودہ خوشگوار تعلقات کو مزید مستحکم کرنے کے لیے ہندوستان کے مضبوط عزم کا اعادہ کیا ہے۔