بم سے اُڑانے کی دھمکیاں، مسافروں میں خوف کا ماحول

حکومت طیاروں کو بم سے اڑانے کی دھمکیوں کا سلسلہ بند کرے :کانگریس
نئی دہلی/کانگریس نے آئے دن طیاروں کو بم سے اڑانے کی دھمکیوں پر حیرت کا اظہار کرتے ہوئے کہا کہ جب لوگ تہوار کے لئے اپنے گھروں کو جانے کی تیاری کررہے ہیں تو ایسی دھمکیاں مل رہی ہیں جس پر حکومت کو سختی سے کام لینا چاہئے ۔ کانگریس نے اپنے آفیشل پیج پر ٹوئٹ کیا کہ ملک کے مختلف حصوں میں آئے دن طیاروں کو بم سے اڑانے کی دھمکیاں مل رہی ہیں جس کی وجہ سے مسافروں میں خوف کا ماحول ہے ۔ یہ تشویشناک بات ہے اور حکومت کو اس سمت میں فوری طور پر ٹھوس اقدامات کرنے چاہئیں۔پارٹی نے کہا ”ملک میں طیاروں کو بم سے اڑانے کی مسلسل دھمکیاں مل رہی ہیں۔ گزشتہ 5 دنوں میں 70 طیاروں کو بم کی دھمکیاں موصول ہوئی ہیں۔ یہ تہواروں کا وقت ہے ۔ لوگ اپنے گھروں تک پہنچنے کے لیے ہوائی جہاز کا سفر کر رہے ہیں لیکن اس طرح کی دھمکیوں نے ملک میں خوف کی فضا پیدا کر دی ہے ۔بم کی دھمکیوں کے سلسلے میں پارٹی نے کہا کہ اس طرح کی دھمکیاں پچھلے کچھ مہینوں سے جاری ہیں۔ اس سے قبل اسپتالوں اور اسکولوں کو بم سے اڑانے کی دھمکیاں موصول ہوئی تھیں۔ لوگ اپنے خاندانوں کی حفاظت کے لیے پریشان ہیں، لیکن مودی حکومت دھمکیوں کے سلسلے کو روکنے کے لیے کوئی ٹھوس قدم نہیں اٹھا رہی ہے ۔