پنجاب پنچایتی انتخابات پر پابندی لگانے سے سپریم کورٹ کا انکار

”اگر عدالتیں ووٹنگ کے دن ہی انتخابات پر روک لگانا شروع کردیں تو یہ ’انتشار‘ کا باعث بنے گا“: سپریم کورٹ
نئی دہلی، 15 اکتوبر (یو این آئی) سپریم کورٹ نے منگل کو پنجاب میں جاری گرام پنچایت انتخابات پر روک لگانے سے انکار کرتے ہوئے کہا کہ ووٹنگ کے دن (15 اکتوبر) انتخابات پر روک لگانے سے ‘انتشار’ پیدا ہوگا۔چیف جسٹس ڈی وائی چندرچوڑ اور جسٹس جے بی پارڈی والا اور منوج مشرا کی بنچ نے انتخابات کو روکنے کا کوئی بھی عبوری حکم پاس کرنے سے انکار کر دیا، لیکن پنجاب اور ہریانہ ہائی کورٹ کے حکم کے خلاف درخواست کی سماعت کرنے پر رضامندی ظاہر کی جس میں اس معاملے میں مداخلت سے انکار کر دیا گیا تھا۔بنچ نے جمہوریت میں انتخابات کی اہمیت پر زور دیا اور کہا، “اگر عدالتیں ووٹنگ کے دن ہی انتخابات پر روک لگانا شروع کردیں تو یہ ‘انتشار’ کا باعث بنے گا۔پنجاب میں آج (15 اکتوبر) صبح 8 بجے سے گرام پنچایتی انتخابات ہو رہے ہیں۔ پنجاب اور ہریانہ ہائی کورٹ نے پنچایتی انتخابات کو منسوخ کرنے کی تقریباً 1,000 درخواستوں کو مسترد کر دیا تھا۔ اس سے قبل ہائی کورٹ نے انتخابی عمل پر روک لگا دی تھی۔درخواست گزاروں نے ہائی کورٹ کے حکم کو چیلنج کرتے ہوئے سپریم کورٹ سے رجوع کیا، جس نے نامزدگی کے عمل میں بے ضابطگیوں کا الزام لگانے والی متعدد درخواستوں کو خارج کر کے پنجاب میں پنچایتی انتخابات کا راستہ صاف کردیا۔ بے ضابطگیوں کا الزام لگانے والی ایک درخواست پر ایک وکیل نے عدالت عظمیٰ سے پنجاب گرام پنچایت انتخابات سے متعلق معاملے کو فوری طور پر درج کرنے کی درخواست کی۔ وکیل نے عدالت سے پیر کو پنجاب اور ہریانہ ہائی کورٹ کے حکم پر روک لگانے کی درخواست کی تھی۔سپریم کورٹ نے متعلقہ فریقوں کے دلائل سننے کے بعد کہا کہ وہ اس معاملے کو سماعت کے لیے درج کرے گی، لیکن انتخابات پر روک نہیں لگائے گی۔بنچ نے درخواست گزار کے وکیل سے کہا کہ ہم انتخابات کو اہمیت دیتے ہیں۔ آپ کے پاس انتخابی درخواستوں میں علاج موجود ہیں…. ہم اسٹے نہیں لگائیں گے ، خاص طور پر جب انتخابات شروع ہو چکے ہیں۔بنچ نے وکیل سے مزید پوچھا کہ ووٹنگ شروع ہونے کے بعد کیا آپ کو معلوم ہے کہ آپ جو مطالبہ کر رہے ہیں اس کی سنجیدگی کیا ہے ؟ کل کوئی کہے گا کہ ووٹنگ شروع ہونے کے بعد پارلیمانی انتخابات یا ریاستی اسمبلی کے انتخابات پر پابندی لگا دی جائے ، کیا آپ اس کے نتائج کا تصور کر سکتے ہیں؟