سیکرٹری صحت نے جموں وکشمیر میں محرم الحرام کیلئے صحت سہولیات کے اِنتظامات کا جائزہ لیا

سیکرٹری صحت و طبی تعلیم ڈاکٹر سیّد عابد رشید شاہ نے آج یہاں سول سیکرٹریٹ میں ایک میٹنگ کی صدارت کی جس میں جار ی محرم الحرام کے لئے صحت خدمات کے اِنتظامات کا جائزہ لیا گیا۔میٹنگ میں ڈائریکٹر ہیلتھ سروسز کشمیر ،ڈائریکٹر ہیلتھ سروسز جموں، تمام اَضلاع کے چیف میڈیکل اَفسران(سی ایم او) اور محکمہ کے دیگر سینئر افسران نے شرکت کی۔
دورانِ میٹنگ ڈاکٹر سیّد عابد رشید شاہ نے محرم الحرام کے دوران بالخصوص اُن علاقوں میں جہاں جلوس نکالے جائیں گے صحت کی مناسب سہولیات کو یقینی بنانے کی ضرورت پر زور دیا۔اُنہوں نے پرائمری ہیلتھ سینٹروں اور ٹراما سینٹروںمیں اَدویات اور ایمبولینسوں کی آسانی سے دستیابی کی اہمیت پر زور دیا اور ہدایت دی کہ یہ سہولیات چوبیس گھنٹے فعال رہیں۔ اُنہوں نے ڈائریکٹروں کو ہدایت دی کہ وہ گورنمنٹ میڈیکل کالجز اور شیر کشمیر اِنسٹی چیوٹ آف میڈیکل سائنسزکے حکام کے ساتھ قریبی رابطہ برقرار رکھیں تاکہ محرم الحرام کے دوران صحت کی تمام ضروریات کو بغیر کسی رُکاوٹ کے پورا کیا جاسکے۔ڈاکٹر عابدرشید نے دونوں ڈائریکٹروں کو ہدایت دی کہ وہ بڑے جلوسوں کی توقع رکھنے والے علاقوں میں اِنتظامات کا روزانہ جائزہ لیں۔اُنہوں نے چیف میڈیکل اَفسران کو خصوصی ہدایات جاری کیں کہ وہ اہم مقامات خصوصاً ماتمی اِجتماعات کے دوران مقامی شیعہ کمیونٹی کے نمائندوں کی مشاورت سے تمام ضروری طبی خدمات کی فراہمی جاری رکھیں تاکہ کسی بھی قسم کی تکلیف سے بچا جا سکے۔سری نگر، بڈگام، بارہمولہ، پونچھ اور جموں سمیت اَضلاع کے ڈائریکٹروں اور سی ایم اوز نے سیکرٹری صحت و طبی تعلیم کو اہم مقامات پر انتظامات کے بارے میں جانکاری دی۔ اُنہوں نے ان علاقوں میں ایمبولینسوں، اَدویات اور دیگر ضروری سامان کی دستیابی کو یقینی بنانے کے لئے تیاریوں کا خاکہ پیش کیا جہاں محرم کے جلوس متوقع ہیں۔