ہندوستان جہاز کے ایندھن کے طور پر میتھانول اور امونیا پر تحقیق کو آگے بڑھانےکے لیے بین الاقوامی شراکت کیلئے کوشاں

 سنگا پور/۔سنگاپور میں ایک ہندوستانی وفد نے نئی ٹیکنالوجیز اور میتھانول اور امونیا کو جہاز کے ایندھن کے طور پر استعمال کرنے کی صلاحیت کو تلاش کرنے کے لیے عالمی شپنگ انڈسٹری کے ساتھ شراکت داری کی کوشش کی ہے۔ ایک سینئر سرکاری اہلکار نے پیر کو  یہ اطلاع دی۔ہندوستانی وفد یہاں سنگاپور میری ٹائم ویک میں شرکت کے لیے آیا ہے جس میں دنیا بھر سے 10,000 سے زیادہ مندوبین شرکت کر رہے ہیں۔بندرگاہوں، جہاز رانی اور آبی گزرگاہوں کی وزارت کے جوائنٹ سکریٹری بھوشن کمار نے کہا، ”ہم تمام نئی ٹیکنالوجیز کے لیے تعاون تلاش کرنے اور شپنگ انڈسٹری کے اسٹیک ہولڈرز کے ساتھ میتھانول اور امونیا کو جہاز کے ایندھن کے طور پر استعمال کرنے کی صلاحیت کو تلاش کرنے کے لیے یہاں موجود ہیں۔ میتھانول اور امونیا کو روایتی سمندری ایندھن کے صاف ستھرا متبادل سمجھا جاتا ہے۔ سبز امونیا اور میتھانول، جو کم کاربن کے ذرائع سے تیار ہوتے ہیں، کاربن کے اخراج کو کم کرنے میں مدد کرتے ہیں۔ اس موقع پر   بھوشن کمار  نے نامہ نگاروں کو بتایا کہ ہمیں سبز ایندھن پر کام جاری رکھنا ہے۔ اس مرحلے پر یہ تجارتی طور پر بہت پرکشش نہیں ہو سکتا ہے، لیکن ہمیں اسے تجارتی طور پر قابل عمل بنانے کے لیے حل کو بہتر بنانا ہوگا۔انہوں نے کہا کہ انڈسٹری کے زیادہ تر اہم کھلاڑی یہاں موجود ہیں اور یہ تعاون اور شراکت داری پر کام کرنے کا صحیح وقت ہے۔انہوں نے مزید کہا کہ ہائیڈروجن کی پیداوار کے تئیں ہندوستان کی کوششوں سے صنعت کو توانائی کی منتقلی میں بھی مدد ملے گی۔انہوں نے کہا کہ ”بھارت گرین شپنگ میں برتری حاصل کر رہا ہے۔انہوں نے مزید کہا کہ تقریباً 2027 تک ہندوستان میں ہائیڈروجن کی پیداوار ایک حقیقت بن جائے گی۔ہندوستان کانڈلا، پارا دیپ اور توتیکورن بندرگاہوں پر ہائیڈروجن مراکز قائم کر رہا ہے۔ کنڈلا میں ریلائنس، ایل اینڈ ٹی اور ویلس پور گروپس کو ہائیڈروجن سنٹر قائم کرنے کے لیے زمین دی گئی ہے۔ ”اگلا مرحلہ یہ ہے کہ ہم اس سبز ایندھن کو کیسے بدل سکتے ہیں اور جہازوں میں بھاری ایندھن کو کیسے بدل سکتے ہیں۔ ہم میتھانول، امونیا، ہائیڈروجن بنانا چاہتے ہیں — ہم ان تمام امکانات کو تلاش کر رہے ہیں اور دنیا بھر میں گرین شپنگ میں آگے بڑھ رہے ہیں جو کہآئی ایم او کا مقصد بھی ہے۔انہوں نے جہاز کے انجن مینوفیکچررز، جہاز کے مالکان اور آپریٹرز کو مشورہ دیا کہ وہ روایتی ایندھن کو سبز ایندھن سے تبدیل کرنے کے حل تلاش کرنے کے لیے اکٹھے ہوں۔کمار نے میری ٹائم پورٹ اتھارٹی اور پورٹ آف سنگاپور اتھارٹی کے ساتھ بات چیت کی۔ انہوں نے سنگاپور کے وزیر ٹرانسپورٹ چی ہانگ ٹاٹ سے بھی ملاقات کی۔”ہم بات چیت کو آگے بڑھائیں گے اور ہم نے انہیں ہندوستان مدعو کیا ہے۔ کمار نے ہندوستانی حکومت کے ملٹی بلین ڈالر کے ساگرمالا پروجیکٹس کے بارے میں بھی اپ ڈیٹ دیا۔ اس منصوبے کا مقصد ملک کی 7,500 کلومیٹر سے زیادہ کی ساحلی پٹی، 14,500 کلومیٹر ممکنہ طور پر بحری آبی گزرگاہوں اور اہم بین الاقوامی سمندری تجارتی راستوں پر اسٹریٹجک محل وقوع کا استعمال کرتے ہوئے لاجسٹک اخراجات کو کم کرنا ہے۔