صحیح علاج دستیاب نہ ہونے کی وجہ سے لوگوں کو شدید مشکلات کا سامنا
نئی دہلی/ پنجاب خصوصاً ضلع امرتسر میں چکن گنیا کی بیماری پھیلنے کا معاملہ بدھ کو لوک سبھا میں اٹھایا گیا اور اس کی روک تھام کے لیے فوری اقدامات کرنے کا مطالبہ کیا گیا۔امرتسر لوک سبھا حلقہ سے کانگریس کے رکن گرجیت سنگھ اوجلا نے وقفہ صفر کے دوران یہ مسئلہ اٹھاتے ہوئے کہا کہ ان کے علاقے اور اس سے ملحقہ علاقوں میں کافی عرصے سے چکن گنیا کی وبا پھیلی ہوئی ہے، جس سے تقریباً 25 لاکھ خاندان متاثر ہیں۔ کوئی صحیح علاج دستیاب نہ ہونے کی وجہ سے لوگوں کو شدید مشکلات کا سامنا ہے ۔ اس بیماری کی وجہ سے لوگ بہت کمزور ہو جاتے ہیں اور وہ چھ ماہ تک مکمل صحت یاب نہیں ہو پاتے ۔ اس کی وجہ سے اس میں مبتلا افراد کی قوت مدافعت بہت کم ہو جاتی ہے جس سے وہ مختلف بیماریوں کا شکار ہو جاتے ہیں۔مسٹر اوجلا نے کہا کہ س مسئلے کو ان کے بار بار ا ٹھانے کے باوجود حکومت پنجاب کوئی قدم نہیں اٹھا رہی ہے ۔انہوں نے کہا کہ کچھ لوگ اس بخار کو کورونا انفیکشن سے متعلق مسائل بھی بتا رہے ہیں۔ مرکزی حکومت کو چاہئے کہ وہ ایک مرکزی ٹیم بھیجے اور چکن گنیا جیسی بیماری کی جامع انکوائری کرے ۔ انہوں نے اس بیماری کو روکنے کے لیے فوری طور پر مناسب اقدامات کئے جانے کا بھی مطالبہ کیا ۔
