لیفٹیننٹ گورنر نے وزیر اعظم نریندرمودی جی کے ذریعہ اَمرت بھارت سٹیشن سکیم کے آغاز اور 508 ریلوے سٹیشنوں کی تعمیر نو فاﺅنڈیشن تقریب میں شرکت کی

وزیر اعظم نریندر مودی نے آج اَمرت بھارت سٹیشن سکیم کا آغاز کیا اور اِس سکیم کے تحت ملک بھر میں زائد اَز 24,470 کروڑ روپے کی لاگت سے 508 ریلوے سٹیشنوں کی تعمیر نو کے لئے بذریعہ ویڈیو کانفرنسنگ سنگ بنیاد رکھا۔لیفٹیننٹ گورنر منوج سِنہا نے بڈگام ریلوے سٹیشن پر ایک تقریب میں شرکت کی۔لیفٹیننٹ گورنر نے اَپنے خطاب میں اَمرت بھارت سٹیشن سکیم کے تحت جموںوکشمیر یوٹی میں جموی توی ، اودھمپور اور بڈگام کے تین سٹیشنوں کو شامل کرنے پر وزیر اعظم کا شکر یہ اَدا کیا۔اُنہوں نے کہا جموںوکشمیر یوٹی میں ریلوے سٹیشنوں کی دوبارہ ترقی سے کنکٹویٹی کو زبردست فروغ ملے گا اور مسافروں کے لئے سفر میں آسانی ہوگی۔لیفٹیننٹ گورنر نے کہا،” میرا ماننا ہے کہ ریلوے کنکٹویٹی معاشرے کی لائف لائن ہے۔ ایک ریلوے لائن نہ صرف مختلف خطوں کے ساتھ رابطے کو مضبوط کرتی ہے بلکہ یہ اِقتصادی خوشحالی اور معیار ِزندگی میں بہتری لاتی ہے۔“اُنہوں نے ریلوے کے جاری منصوبوں اور ریلوے شعبے میں ہونے والی مجموعی تبدیلی پر روشنی ڈالی۔ اُنہوں نے کہا کہ وزیرا عظم کی رہنمائی میں ہم وادی کشمیر میں بے مثال ریل پروجیکٹوں کا مشاہدہ کرتے ہیں۔لیفٹیننٹ گورنر نے کہا،” اِس مالی برس کے آخیر تک کشمیر کنیاکمار ی سے منسلک ہوجائے گا اوریہ وادی کو ملک کے تمام اہم تجارتی مراکز سے جوڑدے گا۔“اُنہوں نے کہا کہ ریلوے بورڈ نے بارہمولہ ۔ بانہال ریلوے لائن کی کشمیر ۔ڈبلنگ ، نیو بارہمولہ ۔ اوڑی ، اونتی پورہ ۔ شوپیان، سوپور ۔ کپواڑہ اور اننت ناگ ۔ بجی بہاڑہ ۔ پہلگام ریل لائن کے پانچ فائنل لوکیشن سروے کے کاموں کو منظوری دی ہے ۔اُنہوں نے مزید کہا کہ منظور ی کے بعد نئے نیٹ ورک وادی میں ریل رابطے کو فروغ دیں گے۔لیفٹیننٹ گورنر نے لوگوں کی بڑھتی ہوئی اُمنگوں کو پورا کرنے والے فضائی او رسڑک کے رابطے کو مضبوط بنانے لئے جموںوکشمیر یوٹی اِنتظامیہ کی جانب سے متعارف کی گئی اِصلاحات کا بھی اِشتراک کیا۔اِس موقعہ پر چیئرمین ضلع ترقیاتی کونسل بڈگام نذیر احمد خان، اے ڈی جی پی جموں وِجے کمار ، صوبائی کمشنر کشمیر وِجے کمار بدھوری ، ضلع ترقیاتی کمشنر بڈگام اَکشے لابرو ، پرنسپل چیف اِنجینئر ناردرن ریلوے وِجے پرتاپ سنگھ ، پی آر آئی ممبران ، نوجوان او ربڑی تعداد میں لوگ موجود تھے۔