کپوارہ مڑھل سیکٹر میں دو غیر ملکی جنگجو مارے گئے، بڑی مقدار میں اسلحہ وگولہ بارود برآمد :دفاعی ترجمان

سری نگر/فوج کا کہنا ہے کہ شمالی کشمیر کے ضلع کپوارہ کے مڑھل سیکٹر میں لائن آف کنٹرول پر ایک آپریشن کے دوران 2 جنگجو مارے گئے۔انہوں نے کہا کہ دونوں مہلوک جنگجووں کی لاشیں اسلحہ و گولہ بارود کے ساتھ بر آمد کی گئیں جبکہ علاقے میں آپریشن ہنوز جاری ہے۔دفاعی ترجمان کی جانب سے جاری کئے گئے بیان کے مطابق بارڈر سیکورٹی فورس(بی ایس ایف ) کی جانب سے انٹیلی جنس اطلاع ملنے کے بعد فوج ، بی ایس ایف اور جموں وکشمیر پولیس نے مڑھل سیکٹر میں دراندازی کے لئے استعمال میں لائے جارہے راستوں پر سیکورٹی فورسز کی تعیناتی عمل میں لائی۔انہوں نے بتایا کہ 18اور 19جولائی کی درمیانی شب سیکورٹی فورسز نے ایل او سی کے نزدیک مشتبہ افراد کی نقل وحرکت دیکھی جس کے بعد سلامتی عملے نے ان کا پیچھا کیا۔انہوں نے کہاکہ کچھ گھنٹے کے بعد سیکورٹی فورسز اور ملی ٹینٹوں کے مابین شدید گولیوں کا تبادلہ شروع ہوا جو کافی دیر تک جاری رہا۔ان کے مطابق فائرنگ کا سلسلہ رک جانے کے بعد تصادم کی جگہ دو غیر ملکی ملی ٹینٹوں کی لاشیں برآمد کی گئیں جن کی شناخت اور تنظیمی وابستگی کے بارے میں جانچ پڑتال شروع کی گئی ہے۔انہوں نے کہاکہ مہلوک ملی ٹینٹوں کے قبضے سے چار اے کے رائفلیں، ایک یو بی جی ایل، پانچ یو بی جی ایل گرینیڈس، نو میگزین، 175اے کے راونڈ، چھ ہینڈ گرینیڈ اور دوسرا قابل اعتراض مواد برآمد کرکے ضبط کیا گیا۔موصوف ترجمان کے مطابق یہ ایک کامیاب آپریشن رہا جس دوران سیکورٹی فورسز کو کوئی نقصان نہیں پہنچا۔انہوں نے مزید بتایا کہ ہمسایہ ملک کی جانب سے وادی کشمیر میں امن و امان کو درہم برہم کرنے کی خاطر ملی ٹینٹوں کو اس طرف بھیجنے کا سلسلہ لگاتار ہے۔ان کا کہنا تھا کہ ملک دشمن عناصر کے منصوبوں کو ناکام بنانے کی خاطر سرحدوں پر تعینات افواج چوبیس گھنٹے اپنی خدمات خوش اسلوبی کے ساتھ انجام دے رہے ہیں۔دریں اثنا کشمیر زون پولیس نے ایڈیشنل ڈائریکٹر آف پولیس کشمیر وجے کمار کے حوالے سے بدھ کی صبح اپنے ایک ٹویٹ میں کہا: ‘مڑھل سیکٹر میں فوج، کپوارہ پولیس اور بی ایس ایف کے ایک مشترکہ آپریشن کے دوران 2 جنگجو مارے گئے’۔ٹویٹ میں کہا گیا کہ دونوں مہلوک جنگجووں کی لاشیں اسلحہ و گولہ بارود کے ساتھ بر آمد کی گئیں جبکہ علاقے میں آپریشن ہنوز جاری ہے۔یو این آئی