کولگام کے بٹہ پورہ گاوں میں سیکورٹی فورسز اور جنگجووں کے مابین شدید گولیوں کا تبادلہ

فورسز نے ایک وسیع علاقے کو محاصرے میں لے کر فرار ہونے کے راستوں پر پہرے بٹھا دئے
جنوبی کشمیر کے بٹہ پورہ کولگام میں صبح سے تلاشی آپریشن جاری رہنے کے بیچ پیر کی سہ پہر کو ملی ٹینٹوں اور فورسز کے مابین گولیوں کا تبادلہ شروع ہوا۔ دفاعی ذرائع نے بتایا کہ علاقے میں دو ملی ٹینٹ پھنس کر رہ گئے ہیں جنہیں مار گرانے کی خاطر اضافی کمک کو بھی طلب کیا گیا۔اطلاعات کے مطابق عسکریت پسندوں کی موجودگی کی اطلاع موصول ہونے کے بعد سیکورٹی فورسز نے پیر کی صبح کولگام کے بٹہ پورہ گاوں کو محاصرے میں لے کر تلاشی آپریشن شروع کیا۔ ذرائع نے بتایا کہ سیکورٹی فورسز نے رہائشی علاقوں کے ساتھ ساتھ وسیع العریض باغات کو بھی محاصرے میں لے کر دن بھر تلاشی آپریشن چلایا جس دوران سہ پہر کے وقت جوں ہی سیکورٹی فورسز کے اہلکار ایک مشتبہ مقام کے نزدیک پہنچے تو وہاں پر موجود ملی ٹینٹوں نے فورسز پر اندھا دھند فائرنگ شروع کی چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا۔ پولیس ذرائع نے بتایا کہ علاقے میں دو ملی ٹینٹ موجود ہیں جنہیں مار گرانے کی خاطر اضافی کمک کو طلب کیا گیا۔ ذرائع نے بتایا کہ سیکورٹی فورسز نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے۔ آخری اطلاعات موصول ہونے تک علاقے میں آپریشن جاری تھا۔ اس سلسلے میں مزید تفصیلات کا انتظار ہے۔