بربرشاہ علاقے میں آگ کی شبانہ واردات

تین رہائشی مکانات تباہ ، لاکھوں کی املاک راکھ ، کئی کنبے آشیانے سے محروم
سرینگر /08اکتوبر /سرینگر کے بربر شاہ علاقے میں آگ کی ایک شبانہ واردات میں تین رہائشی مکانات خاکستر ہوگئے ہیں جس کے نتیجے میں کئی کنبے بے گھر ہوئے جبکہ لاکھوں روپے مالیت کا سازوسامان راکھ کے ڈھیر میں تبدیل ہوگیا ہے ۔ سٹار نیوز نیوٹ ورک کے مطابق سرینگر کے بربر شاہ علاقے میں ہفتہ اور اتوار کی درمیانی روت کو ایک آگ کی واردات میں تین رہائشی مکانات تباہ ہوئے ۔ ذرائع نے بتایا کہ رات کے 3:30بجے بربرشاہ میں ایک رہائشی مکان سے اچانک آگ نمودار ہوئی جس نے فوری طور پر دیگر دو مکانوں کو بھی اپنی لپیٹ میں لے لیا ۔ آگ نمودار ہونے کے فورا بعد مقامی لوگوں اور فائر اینڈ ایمرجنسی عملہ نے آگ پر قابو پانے کی کوشش کرتے ہوئے دیگر آس پاس کے مکانوں کو تو بچالیا تاہم تب تک تین مکانات تباہ ہوچکے تھے جن میں موجود لاکھوں روپے مالیت کا سازوسامان راکھ کے ڈھیر میں تبدیل ہوا ہے ۔ اس آگ کی واردات میں رہائش پذیر کئی کنبے اپنے آشیانے سے محروم ہوگئے اور کھلے آسمان تلے زندگی گزارنے پر مجبور ہوئے ۔ ادھر پولیس نے اس ضمن میں رپورٹ درج کرکے معاملے کی تحقیقات شروع کی ۔ ادھر آگ لگنے کی وجہ فوری طور پر معلوم نہیں ہوسکی ۔