سکریٹری خارجہ وکرم مصری نے ڈھاکہ میں بنگلہ دیشی ہم منصبسے ملاقات کی

ڈھاکہ / ہندوستانی سکریٹری خارجہ وکرم مصری بنگلہ دیش کی عبوری حکومت کے اہم عہدیداروں سے بات چیت کے لئے پیر کو ڈھاکہ پہنچے۔ مصری کے ایجنڈے میں سب سے پہلے ان کے اور ان کے ہم منصب بنگلہ دیش کے خارجہ سکریٹری جاشم الدین کے درمیان دفتر خارجہ کی مشاورت  تھی جو ریاستی گیسٹ ہاؤس پدما میں منعقد ہوئی۔ ڈیلی سٹار بنگلہ دیش کی رپورٹ کے مطابق ایجنڈے کے اہم مسائل میں تجارت، ویزا پالیسیاں، رابطے، سرحدی قتل، پانی کی تقسیم اور باہمی دلچسپی کے دیگر امور شامل ہیں۔ توقع ہے کہ مصری دن کے آخر میں میڈیا کو بریفنگ دیں گے۔ یہ دورہ بنگلہ دیش میں محمد یونس کی سربراہی میں عبوری حکومت کے اقتدار سنبھالنے کے بعد دونوں ممالک کے درمیان پہلی اعلیٰ سطحی مصروفیت ہے۔ بات چیت کا مقصد بہت سارے مسائل کو حل کرنا ہے، جن میں اقلیتوں کے خلاف تشدد کے حالیہ واقعات، اور روحانی پیشوا چنموئے کرشنا داس کی گرفتاری شامل ہے۔ اس سے قبل 4 دسمبر کو، بنگلہ دیش کے چیف ایڈوائزر کے پریس سیکرٹری شفیق العالم نے تصدیق کی کہ یہ ملاقاتیں ہوں گی۔  ستمبر میں، بنگلہ دیش کے خارجہ مشیر محمد توحید حسین نے نیویارک میں اقوام متحدہ کی جنرل اسمبلی کے موقع پر ہندوستانی وزیر خارجہ ایس جے شنکر سے ملاقات کی تھی۔ دونوں فریقوں نے "اچھے ورکنگ ریلیشن شپ” کو برقرار رکھنے اور دو طرفہ تعاون کو آگے بڑھانے کے لیے باقاعدہ  ایف او سی میٹنگز جاری رکھنے پر اتفاق کیا تھا۔