ہندوستان صرف دنیا کی منڈی بن جائے، قبول نہیں: مودی

”ملکی معیشت میں مینوفیکچرنگ بزنس کا حصہ کم لیکن امکانات بہت زیادہ “
نئی دہلی: ۳ مارچ (یو این آئی) وزیر اعظم نریندر مودی نے ہندوستان میں مینوفیکچرنگ انڈسٹری کو فروغ دینے پر زور دیتے ہوئے کہا کہ یہ قابل قبول نہیں ہے کہ یہ ملک صرف دوسرے ممالک کی اشیاءکی مارکیٹ بن جائے۔ انہوں نے بتایاکہ ملکی معیشت میں مینوفیکچرنگ بزنس کا حصہ کم ہے لیکن اس کے امکانات بہت زیادہ ہیں۔ وزیر اعظم نے بتایا کہ ڈیموگرافک ڈیویڈنڈ، جمہوری نظام، نوجوان اور باصلاحیت آبادی کے قدرتی وسائل جیسے مثبت عوامل کی بنیاد پر ہمیں عزم کے ساتھ میک ان انڈیا کی طرف بڑھنے کےلئے راغب ہونا چاہیے۔ مسٹر مودی محکمہ برائے فروغ صنعت اور اندرونی تجارت (ڈی پی آئی آئی ٹی) کے ذریعہ بجٹ2022-23 کے التزامات پر مرکوز آن لائن سیمینار سے خطاب کررہے تھے۔ یہ آٹھواں پوسٹ بجٹ ویبنار ہے جس سے وزیر اعظم نے خطاب کیا۔ سیمینار کا موضوع ’میک ان انڈیا فار دا ورلڈ‘ (دنیا کیلئے ہندوستان میں مینوفیکچرنگ) تھا۔ مسٹر مودی نے بتایا کہ اس بار کے بجٹ میں خود کفیل ہندوستان اور میک ان انڈیا کیلئے کئی اہم التزامات ہیں۔ انہوں نے بتایاکہ یہ قابل قبول نہیں ہے کہ ہندوستان جیسا ملک صرف ایک بازار بن کر رہ جائے۔ وبائی امراض اور دیگر غیر یقینی صورتحال کے دوران سپلائی چین میں خلل کی طرف اشارہ کرتے ہوئے انہوں نے کہا کہ اس سے میک ان انڈیا کی اہمیت میں اضافہ ہوا ہے۔ وزیر اعظم نے کہا کہ ڈیموگرافک ڈیویڈنڈ، جمہوری نظام، نوجوان اور باصلاحیت آبادی کے قدرتی وسائل جیسے مثبت عوامل کی بنیاد پر ہمیں عزم کے ساتھ میک ان انڈیا کی طرف بڑھنے کےلئے راغب ہونا چاہیے۔