جموں وکشمیرمیں شراب پرپابندی کامعاملہ

 پی ڈی پی اورنیشنل کانفرنس ارکان اسمبلی کی جمع کردہ پرائیویٹ بلیں
 کانگریس نے کیاحمایت کااعلان ، سخت قانون سازی کی ضرورت :مونگا
سری نگر/ پردیش کانگریس کمیٹی نے بدھ کے روز جموں و کشمیر میں شراب پر پابندی سے متعلق پرائیوٹ ممبر بلوں کی بھرپور حمایت کا اظہار کیا ہے۔ جے کے این ایس کے مطابق پردیش کانگریس کمیٹی کے سینئر نائب صدر غلام نبی مونگا نے میڈیاکو بتایا کہ پردیش کانگریس، پارٹی پیپلز ڈیموکریٹک پارٹی اور نیشنل کانفرنس ارکان اسمبلی کی طرف سے تجویز کردہ بلوں کی حمایت کرے گی۔ انہوںنے بتایاکہ جموں و کشمیر کے ثقافتی اور مذہبی منظر نامے کی روشنی میں، جو اس کی گہری صوفی روایات کےلئے جانا جاتا ہے، اور بڑھتے ہوئے نشے کے بحران کے تناظر میں شراب کے بڑھتے ہوئے خدشات سے نمٹنے کےلئے سخت قانون سازی کی ضرورت ہے۔ انہوں نے کہا کہ پردیش کانگریس کمیٹی اسمبلی میں پرائیویٹ ممبر بل کی حمایت کرے گی۔قابل ذکر ہے کہ کپواڑہ سے پی ڈی پی رکن اسمبلی فیاض احمد میر کی طرف سے تجویز کردہ پرائیویٹ ممبر بل میں جموں و کشمیر میں الکحل مشروبات کے اشتہارات، فروخت، خرید، استعمال اور تیاری پر مکمل پابندی عائد کرنے کا مطالبہ کیا گیا ہے۔ فیاض احمدمیر نے تشویش کا اظہار کیا کہ بڑھتی ہوئی شراب نوشی معاشرے کےلئے ایک سنگین خطرہ بن رہی ہے، خاص طور پر نوجوانوں پر اس کے اثرات، اور قانون سازوں پر زور دیا کہ وہ اس رجحان کو روکنے کےلئے فوری اقدام کریں۔ اس بل میں پابندی کی خلاف ورزی کرتے ہوئے پائے جانے والے کسی کےلئے قید اور بھاری جرمانے سمیت سخت سزائیں تجویز کی گئی ہیں۔ اسی طرح کے اقدام میں، نیشنل کانفرنس کے ممبراسمبلی احسان پردیسی نے بھی کشمیر اور جموں و کشمیر کے دیگر مسلم اکثریتی علاقوں میں شراب پر پابندی کےلئے پرائیویٹ ممبر کا بل پیش کیا ہے۔احسان پردیسی نے روشنی ڈالی ہے کہ شراب کا استعمال خطے کی صوفی ریشی روایات سے متصادم ہے