3فوجی جوان لقمہ اجل ،3دیگر زخمی

فوری بچاﺅ کارروائی میں مدد کیلئے مقامی لوگوںکا شکریہ :دفاعی ترجمان
بانڈی پورہ / شمالی کشمیرکے ضلع بانڈی پورہ میں ہفتہ کے روز ایک فوجی گاڑی کے ایک پہاڑسے گہری کھائی میں جاگرنے کے نتیجے میں 3فوجی جوانوں کی موت واقعہ ہوئی جبکہ دیگر 3شدیدزخمی ہوگئے ،جو سری نگرمیں زیرعلاج ہیں ۔جے کے این ایس کے مطابق فوجی گاڑی کو یہ خطرناک حادثہ بانڈی پورہ ضلع کے ایس کے پائین علاقے میں اسوقت پیش آیا جب گاڑی ڈرائیور کے کنٹرول سے باہر ہوکر ایک پہاڑ سے گہری کھائی میں گرگئی ۔حکام نے بتایا کہ یہ حادثہ اس وقت پیش آیا جب فوج کی ایک گاڑی سڑک سے پھسل کر گہری کھائی میں گر گئی۔بانڈی پورہ اسپتال کے میڈیکل سپر انٹنڈنٹ ڈاکٹر مسرت نے بتایا کہ حادثے میں زخمی ہونے والے6میں سے 5فوجی اہلکاروں کو اسپتال لایا گیا ہے۔ انہوںنے کہاکہ ان میں سے 2فوجیوں کو پہنچنے پر مردہ قرار دے دیا گیا۔3 زخمیوں کو سری نگر کے ایک اسپتال میں ریفر کیا گیا۔ تاہم، ان میں سے ایک، جو شدید زخمی تھا، راستے میں ہی دم توڑ گیا۔فوج کے ایک ترجمان نے کہاکہ 4جنوری 2024 کو، ضلع بانڈی پورہ میں ڈیوٹی کے دوران، بھارتی فوج کی ایک گاڑی خراب موسم اور مرئیت کے خراب حالات کی وجہ سے پھسل کر کھائی میں گر گئی۔ زخمی فوجیوں کو مقامی لوگوں کی مدد سے طبی امداد کےلئے فوری طور پر نکالا گیا، جس کے لئے ہم فوری مدد فراہم کرنے پر شہریوں کا شکریہ ادا کرتے ہیں۔ افسوسناک حادثے میں3بہادر جان کی بازی ہار گئے۔ بھارتی فوج نے سوگوار خاندانوں سے دلی تعزیت کا اظہار کیا ہے۔