سرینگر/ پارلیمانی پینل نے حالیہ سیشن کے دوران پارلیمنٹ میں پیش کی گئی اپنی رپورٹ میں سفارش کی ہے کہ عام آدمی کے لیے ہوائی نقل و حمل کی رسائی کو یقینی بنانے کے لیے شہری ہوا بازی کی وزارت کو تمام ایئر لائنز کے لیے ”مناسب زیادہ سے زیادہ کرایہ کی حدیں“ متعارف کرانی چاہئیں۔ٹی ای این کے مطابق پارلیمانی پینل نے کہاکہ عام آدمی تک ہوائی نقل و حمل کی رسائی کو فروغ دینے کے لیے شہری ہوا بازی کی وزارت کو تمام متعلقہ عوامل کو مدنظر رکھتے ہوئے، تمام ایئر لائنز پر مناسب اوپری کرایہ کیحد متعارف کرانی چاہیے۔ جس میں آپریشن کی لاگت، سروس کی خصوصیات، معقول منافع اور عام طور پر مروجہ ٹیرف شامل ہو۔31 رکنی کمیٹی نے کہا کہ ایئر لائنز اور عوام دونوں کے مفادات کے تحفظ کے لیے قیمتوں کا نظم و ضبط برقرار رکھنا ضروری ہے۔کمیٹی نے یہ بھی کہا کہ ہندوستانی ریلوے کی طرح، ایئر لائنز کو سیٹ کے حساب سے کرایوں کو ظاہر کرنا چاہئے جو گاہکوں کو شفافیت فراہم کرے گا، ہوائی کرایہ کے نظام کو زیادہ معتبر اور قابل اعتماد بنائے گا۔