پلوامہ میں نامعلوم بندوق بردار نمودار

غیر مقامی مزدوروں پر گولیاں چلاکر کیا زخمی
سرینگر/پلوامہ کے رتنی پورہ علاقے میں ہفتہ کو شام کے وقت اُس وقت افراتفری کا ماحول پھیل گیا جب نامعلوم بندوق برداروں نے دو غیر مقامی افراد پر گولیاں چلاکر انہیں شدید زخمی کردیا جنہیں فوری طور پر ہسپتال پہنچایا گیا۔ اطلاعات کے مطابق جنوبی کشمیر کے ضلع پلوامہ کے رتنی پورہ کھار بٹ پورہ میں اُس وقت افراتفری اور سنسنی کا ماحول پھیل گیا جب وہاں پر نامعلوم بندوق برداروں نے دو غیر مقامی مزدوروں پر گولیاں چلاکر انہیں زخمی کردیا۔ گولیوں کی آواز سن کر علاقے میں افراتفری پھیل گئی اور لوگ محفوظ مقامات کی طرف بھاگنے لگے تاہم اس واقعے کے فوراً بعد پولیس نے مقامی لوگوں کی مدد سے دونوں زخمیو کو فوری طور پر نزددیکی ہسپتال پہنچایا جہاں ان کا علاج و معالجہ جاری ہے ۔ غیر مقامی زخمیوں کی شناخت شمشاد احمد ولد اسلام شیخ اور فیضان قادری ساکنان بہار کے بطور ہوئی ہے ۔ اس واقعے کے بعد پولیس فوج اور فورسز نے حملہ آوروں کی تلاش شروع کرتے ہوئے علاقے کو محاصرے میں لیا تاہم آخری اطلاعات ملنے تک کسی کی گرفتاری یا کہیں پر تصادم آرائی کی کوئی اطلاع نہیں ہے ۔یاد رہے کہ اس سے پہلے بھی ضلع پلوامہ میں کئی غیر مقامی مزدوروں اور کاریگروں پر نامعلوم بندوق برداروں کی جانب سے حملے کئے گئے جن میں ابھی تک کئی غیر مقامی افراد ہلاک یا زخمی ہوئے ہیں ۔ اس کے علاوہ جنوبی کشمیر کے ضلع شوپیاں اور کولگام میں بھی اسی طرح کے واقعات رونماءہوئے ہیں۔