زرمبادلہ کے ذخائر 5.22 بلین ڈالر کم ہو کر 545.7 بلین ڈالر رہ گئے

ممبئی، 23 ستمبر (یو این آئی) غیر ملکی کرنسی کے اثاثوں، خصوصی ڈرائنگ رائٹس (ایس ڈی آر)، سونا اور بین الاقوامی مالیاتی فنڈ (آئی ایم ایف) میں کمی کی وجہ سے 16 ستمبر کو ختم ہونے والے ہفتے میں ملک کے غیر ملکی زرمبادلہ کے ذخائر میں مسلسل ساتویں ہفتے 5.22 بلین ڈالر کی کمی واقع ہوئی۔ ذخائر کم ہو کر 545.7 بلین ڈالر رہ گئے ، جبکہ اس کے پچھلے ہفتے یہ 2.23 بلین ڈالر کم ہو کر 550.9 بلین ڈالر رہ گئے تھے ۔جمعہ کو ریزرو بینک کے جاری کردہ ہفتہ وار اعداد و شمار کے مطابق غیر ملکی کرنسی کے ذخائر کا سب سے بڑا جزو غیر ملکی کرنسی کے اثاثے 16 ستمبر کو ختم ہونے والے ہفتے میں 4.7 بلین ڈالر کم ہو کر 484.9 بلین ڈالر رہ گئے ۔ اس عرصے کے دوران سونے کے ذخائر میں 458 ملین ڈالر کی کمی ہوئی اور وہ کم ہو کر 38.2 بلین ڈالر پر آ گئے ۔اسی وقت زیر جائزہ ہفتے کے لیے ایس ڈی آر 32 ملین ڈالر کی کمی سے 17.7 بلین ڈالر رہ گیا۔ اس عرصے کے دوران آئی ایم ایف کے پاس محفوظ ذخائر 31 ملین ڈالر کم ہوکر 4.9 بلین ڈالر رہ گئے ۔