سیاہ کپڑوں میں کانگریس کا زبردست مظاہرہ

سونیا گاندھی بھی سیاہ لباس پہن کر آگئیں، راہل اور پرینکا کو حراست میں لیا گیا
نئی دہلی، ۵اگست (یو این آئی) کانگریس پارٹی نے جمعہ کو مہنگائی، جی ایس ٹی اور مرکزی حکومت کی پالیسیوں کے خلاف سیاہ کپڑوں میں پارلیمنٹ سے سڑک تک زبردست احتجاج کیا۔ کانگریس صدر سونیا گاندھی بھی سیاہ لباس پہن کر آئیں۔ انہوں نے اپنی پارٹی کے اراکین پارلیمنٹ کے ساتھ پارلیمنٹ میں نعرے لگائے۔ کانگریس لیڈر راہل گاندھی کو پولیس نے حراست میں لے لیا جب وہ پارلیمنٹ سے راشٹرپتی بھون تک مارچ کے لیے روانہ ہو رہے تھے ۔ پرینکا گاندھی وڈرا نے 24 اکبر روڈ پر واقع کانگریس ہیڈکوارٹر میں احتجاج کی قیادت کی۔ جب وہ اپنے اراکین پارلیمنٹ کے ساتھ وزیر اعظم کی رہائش گاہ کا گھیرا¶ کرنے نکلیں لیکن پولیس نے انہیں آگے بڑھنے کی اجازت نہیں دی جس کے بعد وہ کانگریس ہیڈکوارٹر کے سامنے سڑک پر بیٹھ گئیں۔محترمہ پرینکا گاندھی نے پولیس کو بتایا کہ وہ حکومت کے ساتھ سمجھوتہ کرنے نہیں بیٹھی ہیں۔ مہنگائی کی مخالفت کر کے عوام کی آواز اٹھانا ان کا حق ہے ۔ پولیس نے انہیں بھی حراست میں لے لیا۔ اس دوران کانگریس کے تمام بڑے لیڈران بشمول اجے ماکن، سچن پائلٹ، ہریش راوت، اویناش پانڈے کو حراست میں لے لیا گیا۔کانگریس کارکنوں کی بڑی تعداد کے پیش نظر اکبر روڈ پر سیکورٹی کے سخت انتظامات کئے گئے تھے ۔ پولیس نے کئی سطحوں پر اہلکاروں کو تعینات کیا تھا۔ کسی کارکن کو اندر جانے کی اجازت نہیں تھی۔ دہلی پولیس حراست میں لیے گئے کانگریس لیڈروں کو کنگس وے کیمپ پولیس لائنز لے گئی۔ کانگریس کے دیگر ممبران پارلیمنٹ بشمول راجیہ سبھا میں اپوزیشن لیڈر ملکارجن کھرگے ، ممبران پارلیمنٹ جے رام رمیش اور محترمہ رنجیت رنجن کو بھی وہاں لے جایا گیا۔کانگریس کی کارکردگی کو دیکھتے ہوئے جنتر منتر علاقے کو چھوڑ کر پوری دہلی میں دفعہ 144 نافذ کر دی گئی ہے ۔ کانگریس نے الزام لگایا کہ حکومت ہمیں مہنگائی کے خلاف احتجاج کرنے سے روکنا چاہتی ہے ، اس لیے وہ کانگریس لیڈروں کو مسلسل ہراساں کر رہی ہے ۔راجستھان کے وزیر اعلی اشوک گہلوت نے کہاکہ "آپ سمجھتے ہیں کہ ملک میں کیا صورتحال ہے ۔ کسی نے سوچا بھی نہ ہوگا کہ ملک میں عوام کو جمہوریت کا خاتمہ دیکھنا پڑے گا۔ انفورسمنٹ ڈائریکٹوریٹ (ای ڈی)، انکم ٹیکس، سنٹرل بیورو آف انویسٹی گیشن (سی بی آئی) سے ملک میں دہشت ہے ۔دہلی، پٹنہ، ممبئی، بھوپال جیسے ملک کے کئی مقامات پر کانگریس کارکنوں نے مہنگائی کے خلاف زبردست مظاہرہ کیا۔