جموں کے مضافاتی علاقہ میں ڈرون کی سرگرمی

کنٹرول لائن کے نزدیک تلاشی آپریشن بڑے پیمانے پر جاری
جموں کے مضافاتی علاقے میں گزشتہ شب کنٹرو ل لائن کے نزدیک ڈرون کی مشکوک نقل و حمل دیکھنے کے بعد سرحدی علاقوں میں بڑے پیمانے پر تلاشی آپریشن شروع کر دیا گیا ہے تاہم کسی بھی جگہ سے ابھی تک کوئی قابل اعتراض مواد بر آمد نہیں ہوا ۔اطلاعات کے مطابق جموں کے سندھ ون کانہ چک نامی علاقے میں منگل کی شام دیر گئے ڈورن سرگرمیاں دیکھی گئی جس کے بعد وہاں تلاشی آپریشن شروع کر دیا گیا ۔ ذرائع سے معلوم ہو اہے کہ کچھ مقامی لوگوں نے سرحد کے قریب ڈورن کی نقل و حمل دیکھی جس کے بعد انہوں نے پولیس کو مطلع کیا ۔ بتایا جاتا ہے کہ اطلاع ملتے ہی پولیس و بی ایس ایف کی پارٹی جائے موقعہ پر پہنچ گئی جس کے بعد انہوں نے سرحدی علاقے کو محاصرے میںلیکر تلاشی کارروائی شروع کر دی ہے تاہم انہیں کچھ بھی حاصل نہیں ہوا۔پولیس کے ایک سنیئر آفیسر نے اس کی تصدیق کرتے ہوئے بتایا کہ جموں کے سندھ ون کانہ چک علاقے میں گزشتہ شب ڈرون سرگرمیاں دیکھی گئی جس کے بعد وہاںتلاشی آپریشن شروع کر دیا گیا ہے ۔ انہوںنے بتایا کہ ڈرون کی سرگرمیوں کے بعد کنٹرول لائن کے متصل تمام علاقوں میں بڑے پیمانے پر تلاشی آپریشن جاری ہے تاہم ابھی تک کسی بھی جگہ سے کوئی قابل اعتراض چیز بر آمد نہیںہوئی ہے ۔